வடக்கின் பாரிய நிதி மோசடிகளுக்குப் பிள்ளையார் சுழி போட்டது "சப்றா" நிறுவனமே - நாடாளுமன்றில் டக்ளஸ் எம்.பி. சுட்டிக்காட்டு!

'சப்றா யுனிக்கோ பினான்ஸ் லிமிட்டெட்" என்ற தனியார் நிதி நிறுவனமே வடபகுதியில் அன்று எமது மக்களின் பாரியளவிலான நிதியை மோசடி செய்திருந்ததுடன் இன்றைய நிதி நிறுவனங்களின் மோசடி நிலைமைக்கும்" பிள்ளையார் சுழி போட்டது என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா நாடாளுமன்றில் சுட்டிக்காட்டியுள்ளார்.

நாடாளுமன்றில் நேற்றையதினம் நடைபெற்ற நாட்டிலுள்ள நிதி நிறுவனங்கள் தொடர்பாக நிலவுகின்ற பிரச்சினைகள் பற்றிய சபை ஒத்திவைப்பு வேளை விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இது தொடர்பில் அவர் மேலும் கருத்துத் தெரிவிக்கையில் -

நிதி நிறுவனங்களின் பெயரால் எமது மக்களை பாதிப்புகளுக்கு உட்படுத்தி, அம் மக்களைத் தற்கொலைக்குத் தள்ளுகின்ற நிலைமையை எமது பகுதியில் 80களின் முற்பகுதியில் காணக்கூடியதாக இருந்தது. ‘சப்றா யுனிக்கோ பினான்ஸ் லிமிட்டெட்’ என்ற தனியார் நிதி நிறுவனமே அன்று எமது மக்களின் பாரியளவிலான நிதியை மோசடி செய்திருந்தது. அந்த வகையில் எமது நாட்டு மக்களை மோசடி செய்கின்ற வழிமுறையை நிதி நிறுவனங்களுக்கு எடுத்துக் காட்டிய முன்னோடியாகவே இந்த சப்றா நிதி நிறுவனம் எமது வரலாற்றில் பதியப்பட்டிருப்பதை நான் இங்கு வேதனையுடன் எடுத்துக்கூற விரும்புகின்றேன்.

54,018 ரூபா முதலீடு செய்தால் முதிர்ச்சியில் 1 இலட்சம் ரூபா கிடைக்குமெனக் கூறியும், மேலும் பல்வேறு கவர்ச்சிகரமான விளம்பரங்களை மேற்கொண்டும், 207ஆம் இலக்கம், மின்சார நிலைய வீதி, யாழ்ப்பாணம், 61ஆம் இலக்கம், நியூ புல்லர்ஸ் வீதி, கொழும்பு 04 எனும் முகவரிகளைக் கொண்டு ஆரம்பிக்கப்பட்டிருந்த இந்த சப்றா நிதி நிறுவனம், எமது மக்கள் கஸ்டப்பட்டு உழைத்த பணத்தையும், தங்களது பெண் பிள்ளைகளின் திருமணத்திற்கென சிறுகச் சிறுக பெற்றோர்கள் சேமித்திருந்த பணத்தையும், ஓய்வூதியர்கள் தங்களது எதிர்காலம் கருதி சேமித்திருந்த பணத்தையும் அன்றே ஏப்பமிட்டு, இத்தகைய மோசடிகளுக்கு வடக்கில் பிள்ளையார் சுழி போட்டிருந்தது.

இந்த நிதி நிறுவனமானது, கொழும்பை தலைமையகமாகக் கொண்டு ஆரம்பிக்கப்பட்டிருந்த நிலையில், இதனது முகவர் நிலையமானது யாழ்ப்பாணத்தில் ‘சப்றா உமா எக்ஸ்போர்ட் லிமிட்டெட்’ என்றே ஆரம்பிக்கப்பட்டிருந்த போதிலும் மேற்படி நிதி நிறுவனம் குறித்த விளம்பரங்கள் ‘சப்றா யுனிக்கோ பினான்ஸ் லிமிட்டெட்’ என்றே மேற்கொள்ளப்பட்டிருந்தது.

மேற்படி நிதி நிறுவனத்தால் யாழில் எமது மக்களிடமிருந்து கோடிக்கணக்கான பணம் சேகரிக்கப்பட்டு, பின்னர் அந்த பணம் இந்த நிதி நிறுவனத்தின் மூலமாக ஆரம்பிக்கப்பட்டு, இன்றும் யாழில் செயற்பட்டுக் கொண்டிருக்கின்ற ஓர் ஊடக நிறுவனத்திற்கு மாற்றப்பட்டு, அபகரிப்பு செய்யப்பட்டது என்றே தெரிய வருகின்றது.

அக்காலகட்டத்தில் எமது மக்களை ஆசை காட்டி சுருட்டப்பட்ட கிட்டத்தட்ட சுமார் 60 கோடி ரூபாவுடன் 1993 ஆம் ஆண்டில் இந்த நிதி நிறுவனம் இழுத்து மூடப்பட்டபோது, யாழ்ப்பாணத்தில் அரச நிர்வாகம் செயலில் இருக்கவில்லை. இந் நிறுவனம் மூடப்பட்டு, அதன்  நிர்வாக இயக்குநர் இந்தியாவுக்கும் தப்பியோடி விட்டார்.

மேற்படி மோசடிக்கு எதிராக சட்ட நடவடிக்கைகளுக்கான சில முயற்சிகள் மேற்கொள்ளப்பட்டிருந்தும், குற்றவாளிகள் இதுவரையில் தண்டனைக்கு உட்படுத்தப்படாத நிலையில், இதனை இன்றும் தமக்கு சாதமாகப் பயன்படுத்திக் கொள்கின்ற சில நிதி நிறுவனங்கள் இன்றும் எமது மக்களை ஏமாற்றுகின்ற நிலைமைகளே தொடர்கின்றன.

இந்த சப்றா நிறுவனம் அன்று எமது மக்களிடையே மேற்கொண்டிருந்த நிதி மோசடி காரணமாக பலர் தற்கொலை செய்து கொண்டனர். இவர்களில் கோண்டாவில் கிழக்கு பகுதியைச் சேர்ந்த துரைரட்ணம் என்பவரது தற்கொலையானது அக்காலத்தில் மிகுந்த பரபரப்பை எற்படுத்தியிருந்தது. மேலும் பலர் மனநோயாளிகளாக ஆக்கப்பட்டிருந்தனர்.

எனவே, மோசடி நிதி நிறுவனங்கள் தொடர்பில் அவதானத்தைச் செலுத்துகின்றபோது, இந்த ‘சப்றா யுனிக்கோ பினான்ஸ் லிமிட்டெட; நிதி நிறுவனம் தொடர்பிலும் ஆராய்ந்து, உரிய சட்ட நடவடிக்கையினை எடுக்கும்படியும் கேட்டுக் கொள்வதுடன், தற்போது எமது பகுதிகளில் மேற்கொள்ளப்பட்டு வருகின்ற நிதி நிறுவனங்களின் மோசடிகளை தடுத்து நிறுத்துவதற்கு, மேற்படி சப்றா நிதி நிறுவனத்தின் உரிமையாளர்களை சட்டத்தின் முன் நிறுத்துவதானது இன்றியமையாதது என்பதையும் இங்கு வலியுறுத்துவதுடன் நிதி நிறுவனம் தொடர்பில் தனியானதொரு விசாரணைக் குழு அமைத்து, விசாரணைகளை மேற்கொண்டால் சப்றா நிதி நிறுவனத்திற்கும், மேற்படி ஊடக நிறுவனத்திற்கும் உள்ள தொடர்புகள், பங்குகள் போன்ற விடயங்களை வெளிக் கொண்டு வர முடியும் என்பதை இங்கு சுட்டிக்காட்ட விரும்புகின்றேன்.

நுண்கடன் முறைமை முற்றாக தடைசெய்யப்படவேண்டும் - நாடாளுமன்றில் டக்ளஸ் எம்.பி. வலியுறுத்து!

வடக்கு, கிழக்கு மாகாணங்களிலே எமது மக்களை வாட்டி, வதைக்கின்ற மேற்படி நுண்கடன் நிதி நிறுவனங்கள் தொடர்பில் இந்த அரசு வலுவுள்ள, உரிய நடவடிக்கைகளை மேற்கொள்ள வேண்டுமென வலியுறுத்த விரும்புகின்றேன் என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா நாடாளுமன்றில் தெரிவித்துள்ளார்.

நாடாளுமன்றில் நேற்றையதினம் நடைபெற்ற நாட்டிலுள்ள நிதி நிறுவனங்கள் தொடர்பாக நிலவுகின்ற பிரச்சினைகள் பற்றிய சபை ஒத்திவைப்பு வேளை விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இது தொடர்பில் அவர் மேலும் தெரிவிக்கையில் -

 ‘மலர்ந்தது தமிழர் ஆட்சி’ என்று கூறிக் கொண்டு வந்த வடக்கு மாகாண சபையின் மூலமும் எவ்விதமான மக்கள் நலன்சார் திட்டங்களும் இல்லாத நிலையில், எமது மக்கள் இத்தகைய நுண்கடன் நிதி நிறுவனங்களின் சூழ்ச்சிகளில் சிக்குண்டு பல்வேறு பாதிப்புகளுக்கு உள்ளாகி வருகின்ற நிலை ஏற்பட்டிருக்கின்றது. இதே போன்றதொரு நிலைமையினைத்தான் அன்று ‘தமிழனின் வங்கி’ என்று கூறிக் கொண்டு வந்திருந்த சப்றா நிதி நிறுவனமும் எமது மக்களை பல்வேறு பாதிப்புகளுக்கு உட்படுத்தியிருந்தது.

வடக்கு, கிழக்கு மக்களுக்கான பொருளாதார உளவியல் யுத்தமாக மேற்கொள்ளப்பட்டு வருகின்ற இந்த நுண் கடன் நிதி நிறுவனங்களின் நடவடிக்கைகள் காரணமாக, வடக்கு, கிழக்கு மாகாணங்களில் நாளாந்தம் தற்கொலைக்கு முயற்சிப்போரின் எண்ணிக்கை அதிகரித்து வருகின்றது. இத்தகைய முயற்சிகளில் ஈடுபடுகின்ற பலர் சிகிச்சை பலனின்றி உயிரிழந்தும் வருகின்றனர்.

இத்தகைய நுண் கடன் நிதி நிறுவனங்கள் தொடர்பில் அரச தரப்பினருக்கு பல்வேறு முறைப்பாடுகள் முன்வைக்கப்பட்டுள்ள நிலையிலும், அரசு இது தொடர்பில் உரிய நடவடிக்கைகளை இதுவரையில் எடுத்துள்ளதாகத் தெரிய வரவில்லை. ஏற்கனவே எமது மக்களின் பணத்தை மோசடி செய்துள்ள சப்றா நிதி நிறுவனத்தின் மோசடிக்காரர்கள் இத்தகைய நிதி நிறுவனங்களின் பின்னணியில் அல்லது வழிகாட்டிகளாக தற்போதும் இருக்கின்றார்களா? என்பது தெரியாது. சிலவேளை அப்படி இருந்தாலும் ஆச்சரியப்படுவதற்கு ஒன்றுமில்லை என்றே கூற வேண்டும்.

இத்தகைய நிலையில் இலங்கை மத்திய வங்கியின் 2017ஆம் ஆண்டுக்கான அறிக்கையின் இரண்டாவது பகுதியிலே, வங்கிகளற்ற நிதி நிறுவனங்கள் மேற்பார்வை எனும் தலைப்பின் கீழ் மொத்தமாக 51 நிதி நிறுவனங்கள் செயற்பாட்டில் இருப்பதாகவும், மேலும் 68 நிதி நிறுவனங்களை ஆரம்பிப்பதற்கு அனுமதி வழங்கப்பட்டிருப்பதாகவும் தெரிய வருகின்றது.

இவ்வாறான அனுமதிகள் வழங்கப்படுகின்ற நிலையில், நுண் கடன் பிரிவுகளின் கட்டளைக்கும், மேற்பார்வைக்குமான திணைக்களம் ஒன்றும் செயற்பாட்டில் இருப்பதாகக் கூறப்படுகின்ற நிலையில், மேற்படி நுண் கடன் நிதி நிறுவனங்களால் எமது மக்கள் தற்கொலைக்கு துணிகின்ற நிலைமைகள் ஏன் ஏற்படுகின்றன? என்ற கேள்வியே எமது மக்கள் முன்பாக எழுந்துள்ளது.

இன்று எமது மக்கள் பொருளாதார வலிமை இழந்தவர்களாக இருக்கின்ற நிலையில், அவர்களால் ஈட்டப்படுகின்ற சொற்பமான நிதிகூட பினான்ஸ், லீசிங், நுண்கடன் வட்டி, வீடமைப்புக் கடன் வட்டி போன்ற பல்வேறு பிரிவுகளால் தென் பகுதி நோக்கியே அவை நகர்த்தப்பட்டு வருகின்றன.

அது போதாமைக்கு பிற மாவட்டங்களிலிருந்து சென்று வடக்கு, கிழக்கு மாகாணங்களின் வளங்கள் சூறையாடப்படுகின்ற நிலைமைகளும் இல்லாமல் இல்லை. பல்வேறு தொழில்சார் இடையூறுகள் ஏற்படுத்தப்படுகின்றன.

எனவே, வடக்கு, கிழக்கு மாகாணங்களிலே எமது மக்களை வாட்டி, வதைக்கின்ற மேற்படி நுண்கடன் நிதி நிறுவனங்கள் தொடர்பில் இந்த அரசு வலுவுள்ள, உரிய நடவடிக்கைகளை மேற்கொள்ள வேண்டும் என வலியுறுத்த விரும்புகின்றேன் என தெரிவித்துள்ளார்.

கடனுக்கு கடன் பரிகாரமாகாது -  நாடாளுமன்றில் செயலாளர் நாயகம் டக்ளஸ் தேவானந்தா சுட்டிக்காட்டு!

நுண் கடன் சுமைகளிலிருந்து எமது மக்கள் விடுபடுவதற்கு அரச இலகுக் கடன் திட்டங்களை அறிமுகப்படுத்துவது என்பது அதற்கு ஒருபோதும் உரிய தீர்வாகாது. எமது மக்களை தற்போதுள்ள கடன் சுமையிலிருந்து மீட்க என இன்னுமொரு கடன் திட்டத்தினை அறிமுகம் செய்வதானது எமது மக்களை மீண்டும் படுகுழியில் தள்ளிவிடும் செயலாகும் என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா வலியுறுத்தியுள்ளார்.

நாடாளுமன்றில் நேற்றையதினம் நடைபெற்ற நாட்டிலுள்ள நிதி நிறுவனங்கள் தொடர்பாக நிலவுகின்ற பிரச்சினைகள் பற்றிய சபை ஒத்திவைப்பு வேளை விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இது தொடர்பில் அவர் மேலும் தெரிவிக்கையில் -

எனவே, முதலில் மேற்படி நுண் கடன் நிதி நிறுவனங்கள் குறித்து உடனடி ஆய்வுகளை மேற்கொண்டு, நியாமற்ற வட்டி வீதங்களை ஒதுக்கிடவும், முறையற்ற வகையிலான கடன்கள் வழங்கப்பட்டிருப்பின் அவற்றை இரத்துச் செய்திடவும், அவரவர் பெற்ற கடன்களை அவரவர் வசதிக்கேற்ப தவணை முறையில் திருப்பிச் செலுத்துவதற்கு ஒரு கால அவகாசமும் வழங்கிட முன்வர வேண்டும். மேற்படி கடன்களில் பல வலுக்கட்டாயமாக எமது மக்கள் மத்தியில் திணிக்கப்பட்டிருப்பதால் இத்தகைய ஏற்பாடுகள் அவசியமாகும்.

அதேநேரம், எமது பகுதிகள் கடந்த காலங்களில் அடைந்துள்ள பாதிப்புகளையும், எமது மக்களின் பொருளாதார வீழ்ச்சி நிலைமைகளையும் கருத்தில் கொண்டு, அரசாங்கம் புனர்வாழ்வு அதிகார சபையின் ஊடாக மேற்படி கடன் தொகையை மீளச் செலுத்துவதற்கு ஒரு விசேட ஏற்பாட்டினை மேற்கொள்ள வேண்டும்.

அந்த வகையில் எமது மக்கள் மீது வலியப் புகுத்தப்பட்டுள்ள மேற்படி கடன் சுமைகளிலிருந்து எமது மக்கள் மீளுகின்ற நிலையில், எமது மக்களது எதிர்கால வாழ்வு கருதிய வாழ்வாதாரங்களை மேற்கொள்வதற்கு அரசு குறிப்பிடுகின்ற அரச இலகுக் கடன் முறைமைகளை வழங்குவது ஆரோக்கியமாக அமையும் என்பதைத் தெரிவித்து, எனது இந்த கருத்துக்கள் தொடர்பில் ஆராய்ந்து உரிய நடவடிக்கைகளை மேற்கொள்ளுமாறும் அவர் மேலும் கோரிக்கை விடுத்துள்ளார்.

Ninaivil

திருமதி குணம் குலராணி (நகுலம்)
திருமதி குணம் குலராணி (நகுலம்)
யாழ். வல்வெட்டித்துறை
ஜெர்மனி
13 ஒக்ரோபர் 2018
Pub.Date: October 17, 2018
திரு சிவகுரு மகேந்திரராசா (ஓய்வுபெற்ற Marketing Department Manager)
திரு சிவகுரு மகேந்திரராசா (ஓய்வுபெற்ற Marketing Department Manager)
யாழ். நல்லூர்
யாழ். நல்லூர்
15 ஒக்ரோபர் 2018
Pub.Date: October 16, 2018
திருமதி இராசரத்தினம் சிவபாக்கியம்
திருமதி இராசரத்தினம் சிவபாக்கியம்
யாழ். வயாவிளான்
பிரான்ஸ்
12 ஒக்ரோபர் 2018
Pub.Date: October 15, 2018
திருமதி யோகேஸ்வரி பொன்னம்பலம்
திருமதி யோகேஸ்வரி பொன்னம்பலம்
யாழ். கந்தர்மடம்
அவுஸ்திரேலியா
12 ஒக்ரோபர் 2018
Pub.Date: October 13, 2018
திரு குமாரசாமி சித்தார்த்தன்
திரு குமாரசாமி சித்தார்த்தன்
யாழ். திருநெல்வேலி
லண்டன்
9 ஒக்ரோபர் 2018
Pub.Date: October 12, 2018
திரு குலேந்திரன் கந்தசாமி
திரு குலேந்திரன் கந்தசாமி
யாழ். உடுப்பிட்டி
கனடா
8 ஒக்ரோபர் 2018
Pub.Date: October 10, 2018