கல்விச் சமூகத்தின் கனவை நிறைவேற்றியதுபோல் தமிழ் மக்களது ஒட்டுமொத்த கனவுகளையும் நிறைவேற்றிக் கொடுப்பேன் - நாடாளுமன்றில் டக்ளஸ் எம்.பி தெரிவிப்பு!

எமது கல்வி சமூகத்தின் நீண்ட காலக் கனவை இன்று நிறைவேற்றி கொடுத்ததுபோல் தமிழ் பேசும் மக்களின் ஒட்டு மொத்த கனவுகளையும் நிறைவேற்றி கொடுக்கும் இலக்கு நோக்கி தொடர்ந்தும் நடப்பதற்கு அனைத்து தரப்பினரின் ஆதரவையும் நான் சகோதர வாஞ்சையோடு கோரி நிற்கிறேன் என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா தெரிவித்துள்ளார்.

நாடாளுமன்றத்தில் நடைபெற்ற தேசிய பாதுகாப்பு நிதியம் திருத்தச் சட்டமூல தொடர்பிலான விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இதுதொடர்பில் அவர் மேலும் தெரிவிக்கையில் -  

வரலாற்றில் இன்று ஒரு மகிழ்சிகரமான நாள். வட பகுதி கல்விச்சமூகத்தின் கனவுகளில் ஒன்று நிறைவேறிய நாள். யாழ் பல்கலைக்கழகத்தின் 33 ஆவது பொதுப்பட்டமளிப்பில் யாழ்ப்பாண பல்கலைக்கழக பொறியியல் பீடத்தில் இருந்து வரலாற்றில் முதல் தடவையாக 33 பேர் பொறியியல் விஞ்ஞானமாணி பட்டம் பெற்று பொறியியலாளர்களாக இன்று வெளியேறி வருகின்றனர்.

கடந்த ஆட்சியின் போது தேசிய பாதுகாப்பின் காரணமாக படையினரிடம் இருந்த பல்லாயிரம் ஏக்கர் நிலங்களை நான் விடுவித்து மக்களிடம் கையளித்திருக்கிறேன். அதில் 650 ஏக்கர் பரப்பளவை கொண்ட கிளிநொச்சி அறிவியல் நகரும் ஒன்றாகும்.

யாழ் பல்கலைக்கழகத்தின் பொறியியல் மற்றும் விவசாய பீடங்களை அமைப்பதற்கு அந்த அறிவியல் நகரை படையினர் விடுவிக்க வேண்டும் என்று நான் பல்வேறு பிரயத்தனங்களை எடுத்திருந்த போதும், அதற்கான அமைச்சரவை பத்திரத்தை அமைச்சரவையில் நான் சமர்ப்பித்திருந்த போதும்,. அதற்கான அங்கீகாரத்தை நான் பெறுவதற்கு அன்று ஒரு அமைச்சராக இருந்து ஆதரவு வழங்கிய இன்றைய ஜனாதிபதி மைத்திரி பாலசிறீ சேனா அவர்களுக்கும்  முன்னாள் ஜனாதிபதி மகிந்த ராஜபக்ச அவர்களுக்கும்  மற்றும் உயர் கல்வி அமைச்சராக இருந்த எஸ் பி. திசநாயக்கா அவர்களுக்கும் எனது முயற்சிகளுக்கு ஆதரவு நல்கிய ஏனையவர்களுக்கும் வட பகுதி கல்வி சமூகத்தின் சார்பில் நான் நன்றி கூறக்கடமைப்பட்டிருக்கிறேன்.

பொறியியல் துறையை விரும்பும் வட பகுதி மாணவர்கள் தென்னிலங்கையில் தங்கியிருந்து தங்களது பட்டப்படிப்பை தொடர வேண்டிய சிரமங்களுக்கு மத்தியில் தமது சொந்த மண்ணிலேயே அவர்களுக்கான வளாகங்களை அமைக்க வேண்டும் என்ற யாழ் கல்வி சமூகத்தின் நீண்ட காலக்கனவை இன்று நிறைவேற்றி கொடுத்ததுபோல் தமிழ் பேசும் மக்களின் ஒட்டு மொத்த கனவுகளையும் நிறைவேற்றி கொடுக்கும் இலக்கு நோக்கி தொடர்ந்தும் நடப்பதற்கு அனைத்து தரப்பினரின் ஆதரவையும் நான் சகோதர வாஞ்சையோடு கோரி நிற்கிறேன்.

யாழ் பல்கலையில் இருந்து இளம் பொறியியலாளர்களாக வெளியேறி வரும் எம் தேசத்து கல்விக்கண்மணிகளுக்கு வாழ்த்துக்களை கூறி எனது உரையை முடிக்கின்றேன் என தெரிவித்துள்ளார்.

மக்கள் தமது உரிமைகளைக் கோருவது தேசிய பாதுகாப்புக்கு குந்தகமானது அல்ல  - நாடாளுமன்றில் செயலாளர் நாயகம் டக்ளஸ் தேவானந்தா சுட்டிக்காட்டு!

தேசிய பாதுகாப்பு தொடர்பில் இந்த நாட்டில் வாழ்கின்ற அனைவருக்கும் பொறுப்பு இருக்கின்றது. ஆனாலும்,  எந்த வகையிலும் பொறுப்பு அற்றவர்களாக ஒரு சிலர், அடிக்கடி, இந்த நாட்டின் தேசிய பாதுகாப்பிற்கு அச்சுறுத்தல் ஏற்பட்டுள்ளது என ஏன்? கூறுகிறார்கள் என்பது பற்றி ஆராயுமிடத்து, தமிழ் பேசும் மக்களுக்கு எதுவுமே கிடைக்கக் கூடாது என்ற கொள்கையிலிருந்தும், அதனையே தங்களது இருப்பிற்கான பிரதான மூலதனமாகக் கொண்டுமே இனவாத ரீதியில் இந்தக் கூற்றினை அடிக்கடி ஏந்திக் கொண்டிருக்கிறார்கள் என்றே தெரிய வருகின்றது. இது ஒரு துரதிர்ஸ்டவசமான நிலைமையாகும என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா தெரிவித்துள்ளார்.

நாடாளுமன்றத்தில் நடைபெற்ற தேசிய பாதுகாப்பு நிதியம் திருத்தச் சட்டமூல தொடர்பிலான விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இதுதொடர்பில் அவர் மேலும் தெரிவிக்கையில் -  

வடக்கிலே எமது மக்கள் தங்களது சொந்த காணி, நிலங்களை விடுவிக்குதமாறு கோரினால், அது தேசிய பாதுகாப்பிற்கு அச்சுறுத்தல்.

காணாமற்போன உறவுகளைக் கண்டறிவதற்கு உதவுமாறு எமது மக்கள் கோரினால், அது தேசிய பாதுகாப்பிற்கு அச்சுறுத்தல் தமிழ் அரசியல் கைதிகளை விடுவிக்கக் கோரினால், அது தேசிய பாதுகாப்பிற்கு அச்சுறுத்தல்.

இப்போது கேபிள் ரீ. வி. தொடர்பில் வடக்கில் சில பிரச்சினைகள் வந்தாலும்கூட, அதுவும் தேசிய பாதுகாப்பிற்கு அச்சுறுத்தல்.

ஆக, வடக்கில் காய்ச்சல் வந்தாலும் கூட, அதுவும் தேசிய பாதுகாப்பிற்கு அச்சுறுத்தல் என்றே இந்த குறுகிய கூட்டத்தினர் கூறி வருகின்றனர்.

இவ்வாறு ஒரு குறுகிய கூட்டத்தினர் கூறிவருகின்ற கூற்றுகளுக்கு அஞ்சுகின்ற நிலையில், எமது மக்களின் பிரச்சினைகளைத் தீர்ப்பதற்கு தென் பகுதி தலைமைகள் பின்னடித்து வருவதும், இத்தகைய பின்னடிப்புகளுக்கு ‘எமது மக்களின் அனைத்துப் பிரச்சினைகளையும் தீர்ப்போம்’ என்று பொய்யான வாக்குறுதிகளை வழங்கி, எமது மக்களின் கணிசமான வாக்குகளைப் பெற்று அரசியல் அதிகாரங்களைப் பெற்றுள்ள தமி;ழ்த் தலைமைகள் காலக்கெடுக்களை கொடுத்து, எமது மக்களின் பிரச்சினைகளை தவணை முறைகளில் விற்றுப் பிழைக்கின்ற நிலைமைகளே இன்று நடந்தேறிக் கொண்டிருக்கின்றன.

இந்த நாட்டில் தேசிய பாதுகாப்பு என்பது முக்கியமானது. எமது நாட்டைப் பொறுத்தவரையில் 1971ஆம் ஆண்டு முதல் 2009ஆம் ஆண்டு வரையிலான காலப்பகுதிக்குள் உள்நாட்டு ஆயுதமேந்தியப்  போராட்டங்கள் தென் பகுதியிலும், வடக்கு, கிழக்கு மாகாணங்களிலும் உருவாகியுள்ளன.  எனவே, வடக்கு, கிழக்கு மாகாணங்களில் மாத்திரமே அதிகளவில் இராணுவ நிலைகொள்ளல் இருப்பதால் மட்டுமே தேசிய பாதுகாப்பு உறுதிப்படுத்தப்பட்டுள்ளது என்பதில் அர்த்தமில்லை. அது, நீங்கள் உருவாக்கிக் கொண்டுள்ள – உங்களது குறுகிய இனவாத அரசியல் இருப்பினைத் தக்கவைத்துக் கொள்வதற்கான  மாயையேயாகும்.

யுத்தம் முடிவுக்கு வந்ததன் பின்னர் - இன்று வரையில் இந்த இராணுவத்தை அடிப்படையாக வைத்து அரசியல் நடத்தப்பட்டு வருகின்ற இந்த நாட்டில், அத்தகைய அரசியலில் ஈடுபட வேண்டியத் தேவை எமக்கு இல்லை என்பதை இங்கு சுட்டிக்காட்ட விரும்புகின்றேன்.

தேர்தல்கால கூச்சல்களை ஏற்பதா? தேர்தலுக்கு பின்னரான நிகழ்வுகளை ஏற்பதா? குழப்பத்தில் தமிழ் மக்கள் -  நாடாளுமன்றில் செயலாளர் நாயகம் டக்ளஸ் தேவானந்தா தெரிவிப்பு!

 ‘வடக்கிலிருந்து இராணுவம் வெளியேற வேண்டும்’ – ‘வடக்கிலிருந்து இராணுவத்தை வெளியேற்ற எமக்கு வாக்களியுங்கள்’ என வடக்கு மக்களிடம் வாக்கு கேட்கின்ற அரசியலையும், இந்த கோசங்களை அப்படியே சிங்களத்தில் மொழிபெயர்த்து, தென்பகுதியில், ‘இதோ தேசியப் பாதுகாப்புக்கு அச்சுறுத்தல் வருகிறது’–‘வடக்கிலிருந்து இராணுவம் வெளியேற்றப்படப் போகின்றது’– ‘நாட்டைப் பாதுகாக்க எமக்கு வாக்களியுங்கள்’ என தென்பகுதி மக்களிடம் வாக்கு கேட்கின்ற அரசியலையும் போல், நாங்கள் ஒருபோதும் அரசியலில் ஈடுபட்டதும் இல்லை. ஈடுபடப் போவதும் இல்லை என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா தெரிவித்துள்ளார்.

நாடாளுமன்றத்தில் நடைபெற்ற தேசிய பாதுகாப்பு நிதியம் திருத்தச் சட்டமூல தொடர்பிலான விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இதுதொடர்பில் அவர் மேலும் தெரிவிக்கையில் -  

அண்மையில் கூட ஒரு விசித்திரமான சம்பம் நடந்திருக்கிறது. வடக்கில் இருந்து படையினரை வெளியேற்றுவோம் என்று கூச்சலிட்டு தமிழ் மக்களின் குருதியை கொதிப்பேற்றி வாக்குகளை அபகரித்துக்கொண்டவர்கள் சுற்று சூழல் பாதுகாப்பு தினத்தில் அதே படையினருடன் இணைந்து மரங்களை நட்டிருக்கிறார்கள். தேர்தல் காலங்களில் இடும் கூச்சல்களை ஏற்பதா?.. அல்லது தேர்தல் முடிந்த பின்னர் அதற்கு மாறாக நடக்கும் இது போன்ற நிகழ்வுகளை ஏற்பதா? இந்த குழப்பங்களில் தமிழ் மக்கள் இன்று மூழ்கியிருக்கிறார்கள்.

இந்த நாட்டில் தேசிய பாதுகாப்பு கருதி இராணுவமானது அந்தந்த மாவட்டங்களின் சனத் தொகைக்கும், இன விகிதாசாரத்திற்கும் ஏற்ப நிலை கொண்டிருக்க வேண்டும் என்பதை நாம் ஆரம்பத்திலிருந்தே வலியுறுத்தி வருகின்றோம். இதில் எவ்விதமான தர்க்கங்களும் எமக்கில்லை.

ஆனால், எமது மக்களின் சொந்த காணி, நிலங்களை விடுவித்து, எமது மக்களுக்குரிய வாழ்வாதார இடங்களை விடுவித்து, அரசுக்கு சொந்தமான – பொருளாதார ரீதியிலான வளங்கள் குன்றிய காணிகளில் அவர்கள் நிலை கொள்ள வேண்டும் என்பதே எமது கோரிக்கையாகும்.

இதைவிடுத்து, வடக்கு – கிழக்கு மகாணங்களில் படையினர் எமது மக்களின் காணி, நிலங்களில் இருந்து கொண்டு, வர்த்தக நடவடிக்கைகளில் ஈடுபடுவதற்கும், தேசிய பாதுகாப்பிற்கும் இடையில் என்ன சம்பந்தம் இருக்கின்றது? என்பதே எமது மக்கள் மத்தியில் எழுந்துள்ள கேள்வியாகும்.

படையினரின் இந்த வர்த்தக நடவடிக்கைகள் என்பது வடக்கு, கிழக்கு மாகாணங்களில் மட்டுமல்ல, இந்த நாட்டில் பல்வேறு பகுதிகளிலும் இன்று வியாபித்தே உள்ளது என்பதையும் நான் இங்கு சுட்டிக்காட்ட வேண்டும்.

விவசாயத்துறை, கால்நடைப் பண்ணைகள், உல்லாசப் பிரயாணத்துறையுடன் இணைந்த ஹோட்டல்கள், செங்கல் உற்பத்தி, கைப்பணிப் பொருட்கள் உற்பத்தி போன்ற துறைகளில் பாதுகாப்புப் படையினர் ஈடுபட்டு வருவதாகவே தெரிய வருகின்றது.

அரச ஊதியங்களைப் பெறுகின்ற படைச் சிப்பாய்களைப் பயன்படுத்தி, அரச செலவில் பாரிய மானியங்களைப் பெற்று, மக்களின் வளங்களைப் பயன்படுத்தி, அரச செலவில் கட்டிடங்கள், உபகரணங்கள், வாகனங்கள் பெற்றும், முதலீடுகளை மேற்கொண்டும் இவர்கள் எமது பகுதிகளில் மேற்கொள்கின்ற வர்த்தக நடவடிக்கைகளின் முன்பாக, எமது பகுதிகளில் தொழில் முயற்சிகளை ஆரம்பிப்பதற்கு எந்தவொரு முதலீட்டாளருமே முன்வராத நிலையும் தற்போது ஏற்பட்டுள்ளது.

போட்டி முதலீட்டாளர்களுக்குக் கிடைக்கப் பெறாத சாதகமான அரச வளங்களை பயன்படுத்தி இவர்கள் தமது வர்த்தக நடவடிக்கைளை மேற்கொண்டு வருவதனால் இந்த நிலை ஏற்பட்டுள்ளது என்பதையே இங்கு குறிப்பிட விரும்புகின்றேன்.

சொந்த நிலங்களை மீட்பதற்கு தமிழ் மக்கள் யாருக்கும் விலை கொடுக்கவேண்டிய அவசியம் இல்லை - நாடாளுமன்றில் செயலாளர் நாயகம் எடுத்துரைப்பு!

வடக்கு மாகாணத்தில் கிளிநொச்சி, முல்லைத்தீவு போன்ற மாவட்டங்கள் வறுமை நிலை மிகக் கொண்ட மாவட்டங்களாகவே காணப்படுகின்றன. முல்லைத்தீவு மாவட்டத்தைப் பொறுத்தவரையில் பொது மக்களில் இரணடு பேருக்கு ஒருவர் என்ற வீதத்தில் இராணுவத்தினர் அங்கு நிலை கொண்டுள்ளதாகத் தெரிய வருகின்றது. அங்குள்ள வளங்களில் பெரும்பாலானவை படையினரால்  பயன்படுத்தப்படுகின்றது. வர்த்தக நடவடிக்கைகள் மேற்கொள்ளப்படுகின்றன. இத்தகைய நிலையை எந்த வகையில் நியாயப்படுத்துவது என்ற கேள்வியே இன்று மக்கள் மத்தியில் எழுந்துள்ளது என ஈழ மக்கள் ஜனநாயகக் கட்சியின் செயலாளர் நாயகம் டக்ளஸ் தேவானந்தா தெரிவித்துள்ளார்.

நாடாளுமன்றத்தில் நடைபெற்ற தேசிய பாதுகாப்பு நிதியம் திருத்தச் சட்டமூல தொடர்பிலான விவாதத்தில் கலந்துகொண்டு உரையாற்றுகையிலேயே அவர் இவ்வாறு தெரிவித்துள்ளார்.

இதுதொடர்பில் அவர் மேலும் தெரிவிக்கையில் -  

 ‘பொது மக்களது நிதியின் மூலமாக ஊதியம் பெறுகின்ற இராணுவச் சிப்பாய்களை ஈடுபடுத்தி, எல்லையில்லாத வகையிலான வர்த்தக நடவடிக்கைகளில் இலங்கை இராணுவம் தலையீடுகளை செய்து வருவதால், இலங்கையின் பொருளாதாரமானது சமச்சீரற்ற நிலைக்குள் தள்ளப்பட்டுள்ளது’ என  இலங்கையில் அகதிகளுக்கான நீதியைக் கட்டியெழுப்புவதை நோக்கமாகக் கொண்டுள்ள சட்ட ஆய்வுக்கான தென்னாசிய மத்திய நிலையம் (ளுயுஊடுளு) வெளியிட்டுள்ள ஓர் ஆய்வு அறிக்கை கூறகின்றது.

இந்த அறிக்கையானது இலங்கையில் பொருளாதாரத் துறை சார்ந்த இராணுவத்தினரின் தலையீடு காரணமாக ஏற்பட்டுள்ள நெருக்கடி நிலைமைகள் தொடர்பில் ஆராய்ந்து விடயங்களை வெளிப்படுத்தி இருக்கின்றது.

எனவே, இந்த அரசு இத்தகைய விடயங்கள் தொடர்பில் தனது அவதானங்களைச் செலுத்தி, உரிய தீர்வொன்றுக்கு வர வேண்டியது அவசியமாகின்றது.

அதே நேரம், எமது பகுதிகளில் இத்தகைய வர்த்தக நடவடிக்கைகளில் படையினர் ஈடுபட்டு வருகின்ற நிலையில், எமது மக்களின் சொந்த காணி, நிலங்களை விடுவிப்பதற்கு இராணுவத்தினர் நிதி கேட்கின்ற நிலைமைகளும் இல்லாமல் இல்லை. இந்த நிதி எதற்காகக் கேட்கப்படுகின்றது? என்பது தொடர்பில் எமது மக்களுக்கு தெளிவில்லை.

இராணுவத்திற்கென்று வரவு – செலவுத் திட்டத்தின் மூலமாக அரச நிதி ஒதுக்கப்பட்டு வருகின்றது. அது போதாமைக்கு எமது மக்களின் நிலங்களை – வளங்களைப் பயன்படுத்தி வர்த்தக நடவடிக்கைகள் மேற்கொள்ளப்பட்டு வருகின்றன. இந்த நிலையில் எமது மக்களின் காணி, நிலங்களை விடுவிப்பதற்கு என நிதி கேட்கப்படுகின்ற நிலையில், அரசு புனர்வாழ்வு மற்றும் மீள்குடியேற்ற அமைச்சுக்கு ஒதுக்குகின்ற நிதியும் அந்த அமைச்சின் ஊடாக இராணுவத்துக்குப் போய்ச் சேர்கின்றதா? அல்லது அரசுக்கு மீளப் போய்ச் சேர்கின்றதா? என்ற கேள்வி மக்களிடையே எழுகின்றது.

அந்த வகையில் இன்று ஒரு பாரிய பொருளாதார ஈட்டல் துறையாக மாற்றப்பட்டுள்ள படைத்தரப்பின், ஆயுதக் களஞ்சியம் வெடித்து பாதிக்கப்பட்ட அவிசாவளை, சாலாவ பகுதி மக்களுக்கு நீண்ட காலம்; கழிந்துள்ள நிலையிலும் இதுவரையில் நட்டஈடுகள் வழங்கப்படாத நிலையே காணப்படுகின்றது.

அதே நேரம், யுத்தமற்ற தற்காலப் பகுதியில் பாரிய இராணுவத்தினரை வைத்து இந்த அரசால் பராமரிப்பது கடினம் எனில், அவர்களை வெவ்வேறு பணிகளில் ஈடுபடுத்த முடியும்.

குறிப்பாக, போதைப் பொருட்கள் கடத்தல் செயற்பாடுகளை முறியடிப்பதற்கு பயன்படுத்தலாம். வரிகளை அறவிடுவது தொடர்பான விடயங்களில் பயன்படுத்தலாம். சூழல் பாதுகாப்பு தொடர்பில் பயன்படுத்தலாம். வனப் பாதுகாப்பு தொடர்பில் பயன்படுத்தலாம். இலஞ்சம், ஊழல் ஒழிப்பு நடவடிக்கைகளுக்குப் பயன்படுத்தலாம். இது போன்ற அவர்களது துறைகளுடன் ஓரளவேனும் தொடர்புடைய துறைகளில், கௌரவமான துறைகளில் அவர்களைப் பயன்படுத்த முடியும் என்றே நான் கருதுகின்றேன்.

இல்லையேல், விவசாயம், பண்ணைத் தொழில், செங்கல் உற்பத்தி போன்ற துறைகளில்தான் அவர்களை ஈடுபடுத்த வேண்டும் எனில், அதற்கு அரச காணிகள் இருக்கின்றன. பயன்படுத்தப்படாத தனியாரது காணிகள் இருக்கின்றன. அவற்றில் சில எற்பாடுகளுடன் இதனை மேற்கொள்ள முடியும் என்ற கருத்தையும் முன்வைத்து, நான் இங்கு முன்வைத்துள்ள கருத்துகள் எமது மக்களின் நலன்களையும், அதே நேரம் இந்த நாட்டின் முக்கியத் தேவையான தேசிய நல்லிணக்கத்தினையும் அடிப்படையாகக் கொண்டவை என்பதையும் குறிப்பிட்டு, விடைபெறுகின்றேன்.

Ninaivil

திருமதி சுதர்ஷினி இரவீந்திரநாதன் (சுதா)
திருமதி சுதர்ஷினி இரவீந்திரநாதன் (சுதா)
யாழ். கோண்டாவில்
கனடா
14 யூன் 2018
Pub.Date: June 20, 2018
திருமதி கனகசபை சிவகாமிப்பிள்ளை
திருமதி கனகசபை சிவகாமிப்பிள்ளை
யாழ். நெடுந்தீவு
பிரித்தானியா
9 யூன் 2018
Pub.Date: June 19, 2018
திரு நாகலிங்கம் கந்தசாமி (இளைப்பாறிய விஞ்ஞான ஆசிரியர்)
திரு நாகலிங்கம் கந்தசாமி (இளைப்பாறிய விஞ்ஞான ஆசிரியர்)
யாழ். புலோலி
எதியோப்பியா ,கனடா
17 யூன் 2018
Pub.Date: June 18, 2018
திருமதி சின்னத்துரை பரமேஸ்வரி
திருமதி சின்னத்துரை பரமேஸ்வரி
யாழ். சுன்னாகம்
கனடா
12 யூன் 2018
Pub.Date: June 15, 2018
திரு என். கே. ரகுநாதன்
திரு என். கே. ரகுநாதன்
யாழ். பருத்தித்துறை
கனடா
11 யூன் 2018
Pub.Date: June 14, 2018