images-15சிவகங்கை மாவட்டம் காரைக்குடி அருகில் உள்ள பிள்ளையார்பட்டி ஸ்ரீகற்பகவிநாயகர் கோயிலில், விநாயக சதுர்த்தி விழா கொடியேற்றத்துடன் துவங்கியது.

தமிழகத்தில் அனைத்து சிவாலயங்களிலும் விநாயகருக்கு தனிச்சந்நிதிகள் இருக்கின்றன. ஆனாலும் விநாயகப் பெருமானுக்கு, திருச்சி உச்சிப்பிள்ளையார் கோயில், பிள்ளையார்பட்டி கற்பக விநாயகர் கோயில் முதலான சில தலங்கள் மட்டுமே உள்ளன. சிவகங்கை மாவட்டம் காரைக்குடி அருகில், காரைக்குடியில் இருந்து சுமார் 9 கி.மீ. தொலைவில் உள்ளது பிள்ளையார்பட்டி திருத்தலம். இங்கு வருடந்தோறும் விநாயக சதுர்த்தி விழாவானது, வெகு விமரிசையாக நடைபெறும். பத்து நாள் விழாவாக நடைபெறும்.

இந்த வருடம் விநாயக சதுர்த்தி விழா கொடியேற்றத்துடன் துவங்கியது. முன்னதாக, யாகசாலை அமைக்கப்பட்டு, சிறப்பு ஹோமங்கள் நடந்தேறின. ஹோம பூஜைக்குப் பிறகு கொடியேற்றத்துடன் துவங்கியது விநாயக சதுர்த்தி விழா. ஆலயத்தின் தலைமை குருக்களான பிச்சை குருக்கள், சிறப்பு பூஜைகளைச் செய்தார். அப்போது, கோயில் சிவாச்சார்யர்களும் வேதபாடசாலையில் பயில்வோரும் வந்து, வேதங்கள் முழங்க, வந்திருந்த பக்தர்கள் சிலிர்த்துப் போனார்கள்.

இதையடுத்து, விநாயகப் பெருமானும் சண்டிகேஸ்வரரும் சப்பரத்தில் சர்வ அலங்காரத்துடன் திருவீதியுலா வந்தனர். இதையடுத்து 8ம் நாள் விழாவின் போது, சந்தனக் காப்பு அலங்காரத்தில் காட்சி தருவார் கற்பக விநாயகர். வருடத்தில் இந்த ஒருநாள் மட்டுமே, இங்கு பிள்ளையாருக்கு சந்தனக் காப்பு அலங்காரம் செய்யப்படும் என்பது குறிப்பிடத்தக்கது. அதையடுத்து தேரோட்டமும் நடைபெறும். அப்போது இரண்டு தேர்களை இயக்குவார்கள். ஒரு தேரை ஆண்களும் மற்றொரு தேரினை பெண்களுமாக வடம்பிடித்து இழுத்து வரும் காட்சி காணக் கிடைக்காத கண்கொள்ளாக் காட்சி என்று சொல்லிப் பூரிக்கிறார்கள் பக்தர்கள்.

விநாயக சதுர்த்தி நாளான வருகிற 5ம் தேதி அன்று, பிரமாண்டமான கொழுக்கட்டை நைவேத்தியமாகப் படைக்கப்பட்டு பக்தர்களுக்கு பிரசாதமாக வழங்கப்படும். இந்த விழாவின் போது, லட்சக்கணக்கான பக்தர்கள் வந்து கலந்து கொள்வார்கள்.