12-24-2011-32-christmas-2011-celebrates-at-vவேளாங்கண்ணி புனித ஆரோக்கிய மாதா பேராலய திருவிழா, திங்கள்கிழமை கொடியேற்றத்துடன் தொடங்க உள்ளதால், லட்சக்கணக்கான பக்தர்கள் குவிந்துவருகின்றனர்.

நாகை மாவட்டம், வேளாங்கண்ணி புனித ஆரோக்கிய மாதா பேராலய ஆண்டு திருவிழா திங்கள்கிழமை (29ம் தேதி) மாலை 6 மணியளவில் கொடியேற்றத்துடன் தொடங்க உள்ளது. முன்னதாக பேராலய முகப்பில் இருந்து புனித கொடி ஊர்வலம் புறப்பட்டு மீண்டும் முகப்பை அடைகிறது. கொடி மரத்தில் அன்னையின் திருக்கொடியை பேராலய தலைவர் ஏற்றி வைக்கிறார்.

அப்போது, கண்ணை கவரும் வாண வேடிக்கை நடைபெறும். பின்னர் சிறப்பு கூட்டு திருப்பலி நடக்கிறது. விழா நிறைவடையும் வரை தினந்தோறும் தமிழ், ஆங்கிலம், இந்தி, மலையாளம், கன்னடம், தெலுங்கு, மராத்தி, கொங்கணி உள்ளிட்ட மொழிகளில் சிறப்பு திருப்பலி நடைபெறும். செப்டம்பர் மாதம் 8ம் தேதி வரை நடைபெற உள்ள திருவிழாவில், நாள்தோறும் இரவு 8 மணி அளவில் மாதாவின் திருத்தேர் பவனியும் நடைபெற உள்ளது.

இந்த திருவிழாவில் கலந்து கொள்வதற்காக தமிழகத்தின் பல்வேறு பகுதிகள், வெளிமாநிலம் மற்றும் வெளிநாடுகளில் இருந்தும் லட்சக்கணக்கான பக்தர்கள் வேளாங்கண்ணிக்கு வந்து குவிந்துள்ளனர். ஏராளமான பக்தர்கள் பாத யாத்திரையாக நடந்து வருகின்றனர். கடந்த ஆண்டைக் காட்டிலும், நடப்பாண்டு பக்தர்கள் வருகை அதிகரித்து காணப்படுகிறது.

பக்தர்களின் கூட்டம் காரணமாக, வேளாங்கண்ணி விழாக்கோலம் பூண்டுள்ளது. தங்கும் அறை பதிவு செய்யும் இடம் பக்தர்கள் கூட்டத்தால் நிரம்பி வழிகிறது. அங்கு ஏராளமான பக்தர்கள் படுத்து ஓய்வெடுக்கிறார்கள். அறை கிடைக்காதவர்கள் புனித ஆரோக்கியமாதா மேல்நிலைப்பள்ளி, வேளாங்கண்ணி பேருந்து மற்றும் ரயில் நிலையங்களில் குடும்பத்துடன் தங்கி உள்ளனர். போலீசார் குவிக்கப்பட்டு, தீவிர கண்காணிப்பு பணி முடுக்கிவிடப்பட்டுள்ளது.

திண்டுக்கல், மணப்பாறை, திருச்சி, தஞ்சை, பூண்டி மாதா கோயில், ஓரியூர், பட்டுக்கோட்டை, சிதம்பரம், புதுவை, சென்னை, காரைக்கால், நாகூர், நாகை உள்ளிட்ட முக்கிய ஊர்களில் இருந்து வேளாங்கண்ணிக்கு விழாக்கால சிறப்பு பேருந்துகள் வரும் செப்டம்பர் 12ம் தேதி வரை இரவு, பகலாக இயக்க ஏற்பாடு செய்யப்பட்டுள்ளது.

நடப்பாண்டில், 3 லட்சத்திற்கும் அதிகமான பக்தர்கள் வேளாங்கண்ணி திருவிழாவுக்கு வருவார்கள் என எதிர்பார்க்கப்படுகிறது.